/ Forsiden / Studietilbod / Teknikk og Industriell Produksjon / VG2 Industriell Møbelproduksjon
VG2 Industriell møbelproduksjon
Hovedområder
Produktutvikling og produksjon
Programfaget omfattar utforming av produkt, planlegging og gjennomføring av møbelproduksjon. Vidare inneheld programfaget bruk av verktøy og måleinstrument og overvaking og drifting av manuelle og automatiserte prosessar. Helse, miljø og tryggleik er integrert i alt arbeid. Faget inneheld også forståing av nye trendar.
Materiale og teknikkar
Programfaget omfattar arbeid med ulike materiale. Vidare handlar det om korleis kombinasjonar av nye og tradisjonelle materiale kan gi møblar nye moglegheiter og brukseigenskapar. Det omfattar også korleis nye produkt kan utviklast gjennom kombinasjonar av ulike teknikkar og materiale og ulikt utstyr . Miljøutfordringar knytte til materialval inngår i faget.
Dokumentasjon og kvalitet
Programfaget omfattar bruk, forståing og utvikling av arbeidsbeskrivingar, teikningar, skjema og prosedyrar. Bruk av internasjonale standardar hører også med. Dokumentasjonsarbeid omfattar mellom anna å bruke samtalar, bilete, tekst og digitale verktøy. Faget inneheld kvalitetsarbeid med definisjon av kvalitet, registrering og rapportering av avvik.
Formål
Programfaga skal leggje grunnlaget for yrkesutøving innan møbelproduksjon i små og store møbel- og trevarebedrifter. Programfaga skal medverke til produksjon av møblar av høg kvalitet og med design tilpassa stadig skiftande livsstilar og trendar. Bransjen er i kontinuerleg utvikling og endring, og automatisering og robotisering er ein del av kvardagen i bedriftene. Programfaga skal medverke til å utvikle medarbeidarar med høg kompetanse og evne til omstilling og marknadstilpassing.